鐵板餐絕對係富有本地特式嘅經典食品，作為香港本土酒店品牌之一嘅荃灣如心海景酒店，就將鐵板餐帶入酒店餐廳，將鐵板餐提升至更高層次，而價錢仲好合理，所以我哋就嚟到酒店內嘅天空酒廊試吓呢個午市鐵板套餐啦！天空酒廊位於41樓，除咗可以俯瞰荃灣、青衣同遠至汀九橋嘅景色之外，飯前飯後不妨行埋旁邊連接高座同低座嘅玻璃底天橋，打卡一流㗎！
午市鐵板套餐有前菜、主菜、甜品同飲品；一開始仲有熱辣辣麵包同牛油。
田園沙律配粟米紅菜頭及柚子洋葱豉油汁
A姐嘅前菜就選擇咗沙律，份量啱啱好，沙律菜非常新鮮，但最愛就係個柚子洋葱豉油汁，味道好有層次，夠晒開胃。
法式洋蔥湯配芝士多士
我就揀咗法式洋蔥湯配芝士多士，芝士多士脆卜卜，而芝士仲可以拉出絲，芝士味香濃，好有誠意。至於洋蔥湯好足料，洋蔥味好香，食到洋蔥嘅鮮甜味。
澳洲西冷配燒汁
主菜方面，我就揀咗三成熟嘅西冷，選擇三成熟係因為鐵板會令牛肉變熟，所以到食嘅時候就會變成啱啱好嘅五成熟喇！西冷有成220g，份量十足，牛味香濃，肉質軟腍，非常Juicy。
