】A姐最鍾意就係去東涌，事關佢每次去到outlet都會大豐收，仲會不斷氹我買包包俾佢，絕對係男人嘅陷阱。但其實東涌除咗outlet仲有唔少歷史古蹟，今日無懼帶A姐嚟東涌郊遊，尋訪小村落，輕輕鬆鬆嚟個半日打卡遊啦，希望佢行到攰就唔會去outlet掃貨啦！
提提你
作為旅客嘅我哋記住要保持寧靜，唔好影響當地人嘅生活呀
馬灣涌村
有小大澳之稱嘅東涌馬灣涌村，已經有過千年歷史，昔日仲係東涌最熱鬧嘅漁村，依家住喺村內嘅居民雖然唔多，但村內仍保留唔少特色。之所以被稱為小大澳，因為漁民住嘅水上棚屋以木板、鐵板同柚木板建成，同大澳嘅建築風格非常相似。村內有餐廳、理髮店同舊式士多，外牆仲有唔少壁畫，啱晒大家打卡。位於漁村中間仲有一條好特別嘅斷橋，配合埋背後嘅漁村同高樓大廈，影出嚟嘅相真係好獨特。
馬灣涌碼頭
呢個碼頭之所以特別，係因為地上面畫有唔少3D地畫，呢度嘅地畫主題主要係筲箕上嘅海產漁獲，影相打卡好靚㗎 ！
東涌小炮台
建於嘉興22年（1871年），係清政府為加強香港海峽防備而興建，現已被列為法定古蹟。據講呢度曾經有兩座炮台，但而家只係剩返由花崗岩砌成嘅護城牆。
虎地灣灰窰
喺小炮台旁邊就有呢個虎地灣灰窰，考古學家推斷呢個灰窰建於唐代，喺香港發現較為完整嘅灰窰。
東涌炮台
東涌炮台建於道光十二年（1832年），為當時大鵬右營水師總部，阻止英國人走私鴉片同防止海盜侵略，最鼎盛時期有600名水軍駐守，現時已被列為法定古蹟。炮台城牆以花崗石建造，3道拱型城門，分別名為「拱辰」、「接秀」及「聯庚」。城內完整保留6座大炮，炮身刻有清晰字樣，清楚見到重1200斤添！至於位於炮台旁邊嘅兩所學校就被改建成遊客中心，可以入去參觀了解東涌歷史。
